ՆԱԹՕ–ի անդամ Թուրքիոյ հետ ռազմականօրէն սերտ համագործակցութիւն ունեցող Ատրպէյճանի նախագահ Իլհամ Ալիեւը ՌԻԱ Նովոստիին տուած հարցազրոյցին բողոքեր է հայ–ատրպէճանական սահմանին՝ սահմանի ՀՀ կողմէ «ՆԱԹՕ–ի ենթակառուցուածքներու ստեղծումէն»։

Ան ըսած է թէ եւրոպացի դիտորդներու անուան տակ ՆԱԹՕ–ի ենթակառուցուածք ստեղծուած է։

Ըստ Ալիեւի՝ եւրոպացի դիտորդներու հարցը համաձայնեցուած էր Պաքուի հետ 2022–ին՝ Հայաստանի վարչապետ Նիկոլ Փաշինեանի, Ֆրանսայի նախագահ Էմանուէլ Մաքրոնի, Եւրոպայի խորհուրդի նախագահ Շարլ Միշէլի եւ իր մասնակցութեամբ քառակողմ հանդիպման ժամանակ։

Ան աւելցուց որ հետագային դիտորդներուն թիւը հասաւ 200ի եւ անոր միացան Քանատայի ներկայացուցիչները։ Իսկ դիտորդներու առաքելութեան ժամկէտը երկու ամիսով էր եւ երկարաձգման համար իր հետ համաձայնութիւն չէ եղած։