Ինչո՞ւ 5 միլիոն պաղեստինցիներն ունեն պետութիւն ունենալու «իրաւունք», իսկ 40 միլիոնից աւելի քրտերը՝ ոչ. հրէական յայտնի լոբբիստ Տէյվիտ Հարիսն ուշագրաւ քարտէզ է հրապարակել:

Միացեալ Նահանգներում հրէական լոբբիի ամէնահեղինակաւոր գործիչներից մէկը՝ Տէյվիտ Հարիսն (David Harris), իր «X»-ի էջում պարբերաբար անդրադառնում է աշխարհաքաղաքական նշանակութեան հարցերին եւ յատկապէս մերձաւորարեւելեան ցարգացումներին։

Օրերս նա ուշագրաւ հարց է բարձրացրել այս սոցցանցի իր էջում, նշելով, թէ ինչո՞ւ 5 միլիոն պաղեստինցիներն ունեն պետութիւն ունենալու «իրաւունք», իսկ 40 միլիոնից աւելի բնակչութիւն ունեցող քրտերը՝ ոչ։

«Քրտերն ունեն հպարտ ինքնութիւն… երկար պատմութիւն… առանձնայատուկ լեզու… հարուստ մշակոյթ… հիւրընկալութեան աւանդոյթ… ազատութեան հանդէպ անյագ ծարաւ։ Բայց չունեն իրենց պետութիւնը։ ԱՅՈ, ԻՆՉՈ՞Ւ»,- գրել է հրէական լոբբիի առաջամարտիկ Հարիսը։

Ուշագրաւ է յատկապէս այն հանգամանքը, որ Հարիսն իր գրառմանը կցել է Մերձաւոր Արեւելքի քարտէզը, որում շագանակագոյնով առանձնացուած է այն տարածքը, որի վրայ, ըստ ամենայնի, Հարիսի կարծիքով, պէտք է ձեւաւորուի քրտական պետութիւնը։

Նշուած հատուածները ներառում են Թուրքիայի տարածքից էական հատուած, Սիրիայի, Իրաքի, Իրանի, ինչպէս նաեւ Հայաստանի Հանրապետութեան տարածքից հատուածներ։

Մերձաւոր Արեւելքում՝ մասնաւորապէս Սիրիայում, վերջին մէկ ամսուայ ընթացքում ծաւալուող իրադարձութիւնների, Թուրքիայի կողմից քրտերի նկատմամբ ճնշումների նոր ալիքի, Սիրիայի տարածքի նկատմամբ Իսրայէլի յաւակնութիւնների ֆոնին հետաքրքրական է, որ ԱՄՆ-ում հրէական ազդեցութեան գործիչները նման գաղափարներ են առաջ մղում։

Նշենք, որ Տէյվիտ Հարիսն իր ողջ կեանքի ընթացքում եղել է հրէական ակտիւիստ, ղեկավարել է Ամերիկեան Հրէական Կոմիտէն (AJC) 1990-2022 թթ.։ Նրան Իսրայէլի հանգուցեալ նախագահ Շիմոն Փերէսն անուանել է «հրէական ժողովրդի արտաքին գործերի նախարար»։

Հարիսն աւելի քան 20 անգամ պարգեւատրուել է օտարերկրեայ կառավարութիւնների կողմից իր միջազգային գործունէության համար՝ դառնալով ԱՄՆ պատմութեան մէջ ամէնաշատ պարգեւատրուած հրէական կազմակերպչական առաջնորդը։ Նա կրթութիւն է ստացել Փենսիլվանիայի համալսարանում եւ Լոնտոնի Տնտեսագիտական Դպրոցում, ինչպէս նաեւ եղել է հրաւիրեալ գիտնական Ճոնս Հոփքինզի եւ Օքսֆորտի համալսարաններում։

Արաքս Մարտիրոսեան
168.am
28 Դեկտեմբեր 2024