Ինձ մօտ տպաւորութիւն է, որ Հայաստանի հանրութիւնը ունի համոզում, որ Հայաստանում կայ մեծածաւալ կոռուպցիա: Ընդամէնը մի քանի օր առաջ, այցելելով Հակակոռուպցիոն կոմիտէ, այդպիսի միտք էր արտայայտել վարչապետ Նիկոլ Փաշինեանը: Ինչպէս այդ առիթով արդէն անդրադարձել եմ աւելի վաղ հրապարակուած յօդուածում, վարչապետ Փաշինեանի այդ յայտարարութիւնը, ըստ էութեան, բազմաշերտ ակնարկ էր՝ մի կողմից Հակակոռուպցիոն ղեկավարութեանը, միւս կողմից՝ սեփական քաղաքական թիմին:

Ակնարկի իմաստը, ըստ էութեան, այն էր, որ հակակոռուպցիոն գործիքը կարող է կիրառուել, եթէ Նիկոլ Փաշինեանը թիմում արձանագրի «ներիշխանական սեպարատիզմի» ռիսկեր ու վտանգներ: Հակակոռուպցիոն կոմիտէում Փաշինեանի յայտարարութիւնից ընդամէնը մի քանի օր անց կոմիտէն ձերբակալութիւններ է իրականացրել Երեւանի քաղաքային իշխանութիւնում: Այսօր ձերբակալուել են Կենտրոն վարչական շրջանի պաշտօնեաներ: Կոմիտէն յայտնել է, որ ձերբակալութիւնները եղել են աւելի վաղ յարուցուած քրգործի շրջանակում:

Այլ մանրամասներ չեն ներկայացուել, այդ թւում՝ ձերբակալուածների ինքնութեան մասով: Փաստօրէն, Հակակոռուպցիոն կոմիտէն արագօրէն հասկացել է Նիկոլ Փաշինեանի ակնարկն ու անցել գործի, առնուազն Փաշինեանի յայտարարութիւնների լրջութիւնը ցոյց տալու համար: Իսկ ինչ եւ ինչպէս է հասկացել քաղաքական թիմը, բնականաբար տեսանելի կը լինի այդ թիմի վարքագծից: Անշուշտ, Հայաստանում այսօրինակ ձերբակալութիւններն աննախադէպ չեն, սակայն հանգամանքը, որ դրանք իրականացնում է Հակակոռուպցիոն կոմիտէն եւ անում է դա վարչապետի այցից ու յայտարարութիւն-«յանձնարարութիւնից» շատ կարճ ժամանակ անց, միտուած է, իհարկէ, ցոյց տալու, որ տեղի ունեցողը կապուած է հենց վարչապետի յայտարարութեան հետ: Այլ կերպ ասած, դա հենց թիմին ուղղուած ցուցադրական գործողութիւն է:

Ընդ որում՝ յատկանշական է, որ այն ուղղւում է Երեւանի քաղաքային իշխանութեան հասցէով: Հարկ է նկատել, որ կարող էր լինել ցանկացած այլ ուղղութիւն՝ հարկ եղած դէպքում: Եւ յատկանշական է այն, որ Երեւանի քաղաքային իշխանութեան ուղղութեամբ Հակակառուպցիոն կոմիտէի գործողութիւնը տեղի է ունենում մի ժամանակահատուածում, երբ այդ իշխանութիւնը տրանսպորտային այսպէս կոչուած ռեֆորմի առընչութեամբ գտնւում է հանրային մեծ դժգոհութեան թիրախում: Փաստօրէն, այդ դժգոհութեանը զուգահեռ, քաղաքային իշխանութեանը թիրախաւորում է նաեւ Հակակառուպցիոն կոմիտէն՝ Նիկոլ Փաշինեանի յայտարարութեան «հետքով»: Սակայն բացառել պէտք չէ, որ Փաշինեանն այդպիսով սահմանում է «կեղծ» թիրախ՝ գործնականում այդ կերպ փորձելով «թակարդ» պատրաստել ներիշխանական որեւէ իրական թիրախի «բնից հանելու» համար:

Յակոբ Պատալեան
1.in.am
13 Նոյեմբեր 2024