«Ընդ որում՝ նորից եմ ասում, վերադարձի հնարաւորութիւն կար եւ դեռ կայ։ Եթէ, ինչպէս ասում էք, մարդիկ շահագրգռուած են պահպանել իրենց տներն ու հայրենի վայրերը, հաւանաբար, պէտք է օգտուել այդ հնարաւորութիւնից։ Եւս մէկ անգամ շեշտեմ՝ այն կայ», յայտարարում է ՌԴ ԱԳՆ խօսնակ Մարիա Զախարովան, խօսելով Արցախի հայութեան վերադարձի հարցի մասին, որի վերաբերեալ հարցն էլ ուղղուել է նրան ճեպազրոյցի ընթացքում: Մարիա Զախարովան չի ասել, թէ այդ ե՞րբ եւ ինչպիսի՞ն է եղել «վերադարձի հնարաւորութիւնը», որը նրա կարծիքով՝ «դեռ կայ»:

Իհարկէ, այն պայմաններով, որոնք պատկերացնում է Իլհամ Ալիեւը, այդ հնարաւորութիւնը, անշուշտ, կայ: Եթէ Արցախի հայերը համաձայնեն դառնալ Իլհամ Ալիեւի օրէնքին ու պատկերացումներին ենթակայ քաղաքացի, ապա նրանք կարող են վերադառնալ Արցախ եւ նոյնիսկ Ատրպէյճանի ցանկացած քաղաք: Եթէ Մարիա Զախարովան համարում է, որ դա վերադարձի հնարաւորութիւ՞ն է, ապա Մարիա Զախարովան կամ անսահման տգէտ է կամ անսահման ցինիկ:

Որովհետև մարդիկ, որոնք մէկ տարի առաջ իրեն տները լքել են, քանի որ այնտեղ կանգած ռուս խաղաղապահների ներկայութեամբ Ատրպէյճանի իշխանութիւնը սպառնացել է ընդհուպ քաղաքացիական բնակչութեան հանդէպ յատուկ ստորաբաժանումների գործողութիւններով՝ եթէ Արցախը չկապիտուլացուի եւ չլուծարուի,որևէ կերպ չեն կարող պատկերացնել վերադարձ այդ նոյն Ատրպէյճանի ենթակայութեան ներքոյ: Քանի որ ոչ ոք, առաւել եւս Մարիա Զախարովան ու նրա քաղաքական ղեկավարութիւնը չի կարող երաշխաւորել, որ իքս ժամանակահատուած անց դարձեալ չի առաջանայ արցախահայութեան ճակատագրի վրայ առեւտոււր անելու անհրաժեշտութիւն:

Մարիա Զախարովան, անշուշտ, տգէտ չէ, այլ աւելի շուտ՝ ցինիկ, այնպիսին, ինչպիսին են թերեւս աշխարհաքաղաքական բոլոր կենտրոններն ու դրանց խօսնակները, որոնք առ այսօր փնտռում են Արցախում Ատրպէյճանի իրականացրած էթնիկ զտման «ապացոյց»՝ միայն վերացականօրէն խօսելով արցախահայութեան վերադարձի իրաւունքի մասին:

Յակոբ Պատալեան
1in.am
17 Հոկտեմբեր 2024