«Նախարար Զաքիր Հասանովը», յիշեցնելով նախագահ Իլհամ Ալիեւի ասածները, ընդգծել է, որ բանակի գլխաւոր նպատակը ռազմական հզօրութեան եւ մարտական կարողութիւնների մեծացումն է, ինչպէս նաեւ պրոֆեսիոնալ կադրերի պատրաստումը՝ «Ատրպէյճանի ՊՆ» հոկտեմբերի 12-ի հաղորդագրութիւնն այսպէս է ներկայացրել «Թուրան» գործակալութիւնը եւ յավելել, որ «նախարարը կոնկրէտ յանձնարարական է տուել՝ բարձր մակարդակի վրայ պահել զօրքերի մարտունակութիւնը, բարձրացնել զգօնութիւնը, ինչպէս նաեի պայմանական սահմանին ռևանշիստական ուժերի բոլոր հնարաւոր սադրանքների դէմ կանխարգելիչ միջոցներ կիրառելու պատրաստականութիւնը»:

Այս տեղեկատուութիւնը Հայաստանի քաղաքական որոշ շրջանակներ, փորձագիտական հանրութիւնը, սոցիալական մեդիան գնահատեց «Ատրպէյճանը պատերազմի է նախապատրաստւում» ընկալմամբ: Զաքիր Հասանովի «աշխատանքային խորհրդակցութեան» ոգին, իհարկէ, ամենեւին էլ պացիֆիստական չէ, բայց խնդիրը, որ նա Իլհամ Ալիեւի անունից առաջադրել է զօրքերին, աւելի վտանգաւոր է, քան կը լինէր լայնածաւալ ագրեսիայի անոնսը:

«Բարձրացնել պայմանական սահմանին ռեւանշիստական ուժերի բոլոր հնարաւոր սադրանքների դէմ կանխարգելիչ միջոցներ կիրառելու պատրաստականութիւնը»,– ատրպէճանական խարդախամտութիւնից եթէ թարգմանենք, ապա կը ստացուի, որ ամէնաբարձր մակարդակով զօրքերի առջեւ դրւում է հայ-ատրպէճանական սահմանին դիվերսիոն ներթափանցումներ իրականացնելու մարտական առաջադրանք:

Վերջին հրապարակային ելոյթում Իլհամ Ալիեւը Հայաստանին «խորհուրդ է տուել» չմոռանալ ոչ միայն քառասունչորսօրեայ պատերազմը, այլեւ անցեալ տարուա սեպտեմբերի 19-ի «հակաահաբեկչական գործողութիւնը»: Աւելի վաղ նա ասել է, որ եթէ համոզուի, որ Հայաստանը ձեռք է բերում յարձակողական սպառազինութիւն, ապա «ձեռքերը ծալած չի սպասի»:

Ի՞նչ է ծրագրում Ատրպէյճանի բանակը, կարող են դատել ռազմական փորձագէտները, բայց ընդհանուր ընկալումն այն է, որ նախ տեսանելի, ոչ այնքան հեռաւոր ապագայում Ալիեւի ռազմական գերատեսչութիւնը վերսկսելու է «հայկական կողմից հրադադարի խախտման» կեղծ քարոզչութիւնը, շրջանառութեան է դրուելու, որ Հայաստանի ԶՈՒ–ն «միատարր-միասնական չեն, սահմանին հերթապահութիւն են իրականացնում ոչ կանոնաւոր զինուած կազմաւորումներ»:

Ինչ-որ «կրիտիկական աստիճանի» հասցնելով այդ «կազմաւորումների ամէնաթողութեան» կեղծ քարոզչութիւնը՝ Ատրպէյճանը շրջանառելու է «սահմանամերձ բնակավայրերի խաղաղ բնակչութեան անվտանգութեան ապահովման նպատակով հակաահաբեկչական գործողութիւններ իրականացնելու իրաւունքի» թեման:

Ատրպէյճանի ԶՈՒ յատուկ նշանակութեան զօրախումբը Թուրքիայի «հոգեզաւակն» է, ստեղծուել է թուրք պրոֆեսիոնալների կողմից, լիովին ասոցացուած է թուրքական համասեռ ուժերի հետ: Ալիեւի ռազմաքաղաքական նպատակը Հայաստանի, պայմանականօրէն ասած, «սիրիականացումն» է. ինչպէս Թուրքիան է տրանս-սահմանային ռազմագործողութիւններ իրականացնում «քուրդ ահաբեկիչների» դէմ, այնպէս էլ Ալիեւն է ծրագրում «թիրախային հարուածներ հասցնել հայկական ռեւանշիստական ուժերին»:

Ակնյայտ է, որ Հայաստանի ԶՈՒ-ն չեն կարող մնալ նախկին ռեժիմում եւ նոյն կառուցուածքն ունենալ: Հայ հանրութիւնն իր հերթին պէտք է արագօրէն ձերբազատուի «հրացանաւոր մարդու» կամ «աշխարհազօրային պատերազմի» կերպարից:

Բարդ եւ դժուար ժամանակներ են սպասւում, եւ մարտահրաւէրը հնարաւոր է յաղթահարել միայն պրոֆեսիոնալ մշակումների հիման վրայ կառուցուած պաշտպանական նոր ռազմավարութեամբ: «Ֆիդայական պատերազմի» հարիւր յիսունամեայ էջը պէտք է վերջնականապթս փակել եւ յանձնել արխիւներին:

Վահրամ Աթանէսեան
1in.am
13 Հոկտեմբեր 2024